英小報傳蘋果有意收購曼聯 疑斥資58億英鎊

英國多份小報報道，科技巨企蘋果公司有意以58億英鎊，即係約546億港幣，收購英超足球隊曼聯，如果成事，就會打破車路士5月嘅收購價，曼聯亦成為全世界最有錢嘅球會。

曼聯老闆加沙家族日前傳出有意放售曼聯，佢哋2005年以8億英鎊收購曼聯，報道話，加沙家族最先開價82.5億英鎊，但預計蘋果會出手58億。

蘋果從未收購過球隊，報道指，蘋果睇中咗曼聯背後龐大嘅商機，不過，無論邊個收購曼聯，都要為奧脫福球場俾15億嘅重建費用。