李家超訪京觀升旗禮　稱心情格外振奮

特首李家超繼續訪京行程，佢日前拜見咗外交部長秦剛，今早喺天安門睇升旗禮，李家超喺社交平台話，上任之後首次喺北京睇升旗禮，心情格外振奮。

李家超話，睇著國旗喺風中飄揚，莊嚴而神聖，令佢諗起國家經過長期奮鬥，各方面都取得驕人成就，綜合國力日益強大。身為中華兒女都應感到自豪同埋驕傲，更努力為國家嘅發展作出貢獻。

李家超走訪多個中央部委及機構，琴日又同香港駐京辦嘅人員行街市，體驗老胡同生活。