祥祺陳紅天旗下多個物業被接管 包括紅磡祥祺中心

深圳財團祥祺集團旗下多個喺香港嘅物業相繼被接管，其中祥祺嘅總部紅磡祥祺中心琴日被恒生銀行委託羅兵咸接管，引起市場關注創辦人陳紅天嘅經濟情況。

唔只係祥祺中心，陳紅天持有嘅山頂豪宅傲璇亦都被接管。陳紅天2016年以45億向會德豐購入祥祺中心，當年刷新九龍區甲級商廈嘅最貴記錄。另外，陳紅天2016年以21億購入山頂歌賦山道15號地，當時打算拆卸重建，但已經停工好耐，21億當中陳紅天部分以深圳物業易物作為付款，有16.8億分三期現金支付，佢只係俾咗首期6.3億，2019年再向東亞銀行一按以及二按，物業今個月初被德勤接管。

早喺2018年陳紅天已經被傳財困，多個物業抵押貸款，當時佢回應話係正常融資安排。