知名連鎖餐廳「半天妖」被指用過期食品　當局進行調查

喺內地有過千間分店嘅知名連鎖烤魚餐廳「半天妖」被揭發用過期食品，有分店負責人要求「唔臭就可以用」，標榜用新鮮食材，但其實係用冷凍魚，當局介入調查。

有內地傳媒報導，安徽合肥市有34間半天妖分店，經常都大排長龍，相當受歡迎，不過，報道話，餐廳用冷凍魚，一啲魚解凍之後有異味都繼續用，其他食材過咗保鮮期都會用，有負責人同員工講，只要唔臭，都繼續用。

報道又指，店內衛生問題嚴重，有廚房員工經常徒手接觸加工好嘅食品，又會用抹地板嘅毛巾抹工作台。目前合肥市市場監督管理局已經展開排查。