換新鈔出錯銀行電客戶「回收」 事主：佢做錯事「數錯」要我負責？

有網民近日到某銀行換了一萬元新鈔，「想要$20、$50、$100同$500」，當時，事主係好隨意講每個面值要幾多，仲用櫃位記事紙，寫低每個面值，總數係一萬蚊。銀行職員即時在事主面前，用數鈔機點算，事主收到總值1萬元的新鈔，相信銀行，也沒有再數過確認，但是，事主表示，當日晚上約六時，收到該銀行來電，指換新鈔職員數多了新鈔給他，「銀行話個職員唱多咗$1000俾我，應該係二十蚊紙嗰度出錯多咗。」
銀行希望事主「即時數返啲錢再同佢哋確認返，會喺我個銀行戶口扣返$1000」。有網民奇怪何以銀行事後會知「畀多咗」，事主留言指可能是銀行翻查CCTV，最後查出。
事主對於銀行出錯，卻要他「自己要用人手數一次」感無奈，他反問：「其實我係咪冇義務幫返呢個銀行職員？佢做錯事要我負責，再者，前後講緊6個鐘，原則上d錢，已經分散晒，浪費我嘅時間。唔明點解可以咁都數錯。」不少網民再苦勸：「唔係你既就畀番人啦，唔係義務問題喎，係誠信問題。」
事主留言表示，最後他有應銀行要求，核算新鈔數量，有網民問事主點算後，結果有無「畀多咗」？事主答：「係多咗，銀行其實都已經好肯定係畀多咗我，只係等我覆檢確認。」