班馬扮食飯準備求婚 飯局原來AA制 見證後準新娘向大家追收飯錢 

有準新郎班馬扮食飯準備求婚，但豪華飯局原來AA制，朋友見證後準新娘做醜人，翌日向大家追收飯錢，閨蜜唔順氣，在網上大爆飯腳的敢言回應。而留言的網民則幾乎一面倒力撐樓主，有人認為「事前無講就唔夾」；有人表明會照夾錢，但「不再相見」。 樓主本月26日在社交平台以「黐Ｘ線求婚叫朋友夾錢」為題發帖，稱「噚日我閨蜜個男朋友叫晒啲朋友，話買咗花同埋戒指，準備今晚求婚，叫我哋出嚟扮食飯，唔好同佢女朋友講，OK大家二話不說幾忙都應承出嚟食飯，食到咁上下佢就開始拎啲嘢出嚟求婚，成餐都好順利嘅」。 但豪華飯局原來AA制，朋友見證後準新娘做醜人，翌日向大家追收飯錢，樓主指每人夾返$800左右，比你哋會點做，唔夾怕之後面左左，夾又覺得唔順氣」。 樓主回應表明「真人真事，25日發生嘅」。樓主進一步透露，「有一大半人已俾咗錢，其中一個有話：你唔係咁都叫人夾嘛？但都俾咗錢，佢應該比得好唔gur（唔順氣）」。 還有人詢問「食咩飯要$800？」，樓主解畫「一間4星級左右嘅餐廳，啲嘢OK好食，但唔值$800囉」、「我望到張單Total（總數）約1萬幾，有叫酒但我無飲，（只係望咗一眼，唔肯定Exactly（實際）個數），所以唔知佢有無計埋紮花和蛋糕，除返條數應該都合理嘅」。 回應的網民大都站樓主這邊，有人表明唔夾錢，有人卻列出會夾錢的條件：「人情度扣返」、「夾餸算啦，夾咩錢」、「呢啲朋友要斷捨離啦」、「可能被要求夾酒席錢」、「我會照夾錢，然後不再相見」。夾唔夾錢應該一早講明，事後先話要夾好肉酸囉成件事。你哋全部人都唔好夾呀，扮唔記得過數。 留言一面倒。證明大家都係正常人。我諗你都應該知點做，佢求婚做咩要你買單，就算想人俾錢都要事前講清楚啦，到時知道要俾錢都照去就係你情我願。不過，亦有網民認為食飯AA制合理，但補充「$800係貴的」。