內地著名網絡論壇天涯社區疑欠費被迫關閉

曾經係內地最大嘅網絡論壇「天涯社區」今個月開始無法訪問，雖然對外公布係技術更新，但天涯社區前執行總編宋錚話，其實係因為欠費而伺服器被關閉。 宋錚日前透露，天涯冇死，只係全身癱瘓，伺服器欠費被停，因為打官司域名都被法院凍結。唔少網民都感嘆，又話天涯係自己嘅青春。 天涯社區由1999年開始經營，係內地網絡早期嘅論壇之一，有討論各類話題項目嘅版面，官方曾話每月有超過2.5億用戶。但近年社交平台興起，論壇逐漸沒落，天涯社區開始傳出經營不善嘅消息，再加上涉及多宗案件，被執行近1.46億人民幣，好可能因為咁資不抵債而需要關閉。