阿富汗塔利班宣布禁止女性讀大學　美國批要承擔後果

阿富汗塔利班政府自從奪回權力後，逐漸收緊女性權利。繼早前禁止女性讀中學後，塔利班宣布即時禁止女子讀大學，又呼籲學校將女子趕出校園，現時阿富汗女性都唔可以接受教育。 聯合國話，對事件深表關切，認為教育係基本人權，又話塔利班閂咗女性教育嘅大門，等於閂咗阿富汗嘅未來。 塔利班掌權後，曾經承諾唔會收緊女性權利，但近月嘅行動似乎唔係咁，美國國務院就話，塔利班會承受後果，令自己進一步受到國際孤立。