李家超回應簡約公屋過貴 稱冷冰冰數字無計算市民艱苦

政府早前向立法會提交興建「簡約公屋」嘅方案，其中造價比傳統公屋更貴，引起唔夠效益嘅質疑。特首李家超今日喺一個經濟論壇話，簡約公屋係破格措施，為居住環境艱苦嘅市民，提供新選擇，唔理解有人用唔同方式計算簡約公屋係唔係物超所值，但以冷冰冰嘅數字，無計算每日喺廁所門口食飯、廁所廚房差唔多地方，每日同木蝨、蟑螂一齊住嘅艱苦。 李家超又話，比較簡約公屋及過渡性房屋造價唔合理，過渡性房屋只有幾層高，但簡約公屋興建十幾層，提供多一倍單位，電梯及打樁等設計都係必須。佢又講到，簡約公屋可以俾居住環境差嘅家庭提前一年上樓，咁先係能夠處理脫困嘅數學。