只收到3個「團出團入」登記 旅議會稱意料之內

政府早前宣布允許旅行團「團出團入」，喺黃碼期間，可以入主題公園、景點，又可以喺指定餐廳食飯。旅議會話，目前只收到3個黎自泰國嘅入境團登記，又認為係意料之內。 旅遊業議會主席徐王美倫話，3個泰國旅行團嘅行程大致相同，都係昂坪360、天壇大佛以及淺水灣，又話即使當局增加黃碼人士可進入嘅處所，入境旅客都唔會激增，相信12月會有更多入境團登記。 入境團旅行社協會創會會長謝淦廷就認為，團出團入只係「有好過無」，唔少地區已大開中門，香港先逐步放寬，需要時間加入競爭。