北京下月復辦馬拉松　陸續辦大型活動預示復常生活？

北京馬拉松因為疫情停辦兩年，今日主辦單位宣布，將喺11月6日復辦，總參賽規模3萬人，由天安門廣場作為起點，終點係奧林匹克公園景觀大道，但就僅限北京常住人口報名。參賽選手需要完成接種新冠疫苗，以及比賽當天有24個鐘內嘅核酸檢測證明，跑步期間無需要戴口罩。 由於疫情反覆，內地已多次暫停舉辦大型活動，不過，近日多個大型活動陸續宣布再次舉辦，杭州馬拉松亦會喺11月20日舉行，之後深圳亦會喺明年4月舉行女子冰球世錦賽，而上月底成都亦已舉行國際乒聯世界乒乓球團體錦標賽。 唔少網民都表示，係唔係預示疫情快結束，或者內地要開始復常生活。