有報導指數百公務員持可疑免針紙 梁籌庭難證明虛假

警方早前先後拘捕7名私家診所西醫，涉嫌濫發免針紙（即新冠疫苗接種醫學豁免證明書），政府隨後亦宣布，被捕醫生發出嘅兩萬多張免針紙將會下月12日失效。有傳媒報導，有約300名公務員，懷疑持有被捕醫生開出嘅免針紙，政府稱會嚴肅處理。公務員工會聯合會總幹事梁籌庭表示，政府有權處罰員工，亦可以解僱，但要證明免針紙屬於虛假有一定難度。 有傳媒指，政府嚴肅看待事件，會要求持有涉事免針紙嘅公務員，重新提交醫生證明，如果無法提交就唔可以進入辦公室。梁籌庭表示，早年都有公務員稱生病後購買醫生紙，但難以核證員工係唔係患病，免針紙情況一樣，佢話，市民經由醫生先取得證明書，責任應喺醫生上。 政府曾回應指，由10月12日起，有關僱員未能提供新嘅證明書或接種疫苗，會被拒絕進入政府大樓及辦公室，如因此未能上班，會被視為「無故缺勤」。